មាស ម៉ើ បានប្រាប់ Sabay ថាការចាញ់ ធា នុរាជ មិនមែនជាសមត្ថភាពពិតរបស់គេទេសម្រាប់ការប្រកួតប្រដាល់ក្បាច់គុនចម្រុះរបស់ស្ថានីយទូរទស្សន៍បាយ័នក្នុងកម្មវិធី BKM កាលពីថ្ងៃទី ១១ ខែ មេសាឆ្នាំ ២០១៥ ។
ម្ចាស់ខ្សែក្រវាត់ក្បាច់គុនចម្រុះក្នុងទ្រុងរបស់ស្ថានីយទូរទស្សន៍ My TV មាស ម៉ើ បានឲ្យដឹងថាការចាញ់ ធា នុរាជ ជាការប្រកួតមួយដោយមិនអស់សមត្ថភាពឡើយព្រោះនៅមានចម្ងល់ក្នុងចិត្តរឿងយកឈ្មោះរបស់គេដាក់ឲ្យប្រកួតដំណាងក្លិបកងទ័ពជើងគោកបន្តទៀតទាំងរូបគេបានចេញពីក្លិបនោះជាងមួយឆ្នាំទៅហើយ។ អ្នកប្រដាល់មកពីខេត្តកំពង់ធំបានបន្តថាគេមិនមានអារម្មណ៍ក្នុងការប្រកួតឡើយព្រោះគ្មានទឹកចិត្តវ៉ៃដើម្បីយកឈ្នះដៃគូ។
មាស ម៉ើ បានបាននិយាយថា « គ្មានអារម្មណ៍វ៉ៃទេបើលោកគ្រូ ឈឿន ឆៃ នៅតែរករឿងដូចនេះ។ តែបើប្រកួតឲ្យអស់សមត្ថភាព ធា នុរាជ មិនមែនជាដៃគូខ្ញុំឡើយហើយការប្រកួតចាញ់ដៃគូលើកដំបូងនេះមិនមែនជាសមត្ថភាពពិតរបស់ខ្ញុំទេ ព្រោះខ្ញុំវ៉ៃទាំងមិនអស់កម្លាំងកាយចិត្ត»។
អ្នកប្រដាល់ទើបទទួលពាក្យចាញ់លើកទី ១ បានលើកឡើងទៀតថាគេសុខចិត្តធ្វើឲ្យការប្រកួតរបស់ខ្លួនចាញ់ប្រសិនបើរូបគេវ៉ៃដំណាងឲ្យក្លិបដែលធ្លាប់ធ្វើបាបគេនោះ ហើយក្រោយពេលប្រកួតចប់ដឹងថាខ្លួនចាញ់ ធា នុរាជ នោះរូបគេបានណាត់ ធា នុរាជ ប្រកួតម្ដងទៀតនៅប៉ុស្តិ៍ My TV បន្ទាប់ពីស្ថានីយមួយនេះរៀបចំរួចរាល់ និងបើកការប្រកួតសាជាថ្មី ។
មាស ម៉ើ បានប្រាប់ថា បើតាមការសាកសួររបស់គេទៅលោក ម៉ា សេរី អ្នករៀបចំការប្រកួតនៅ My TV បានប្រាប់ ម៉ើ ថាប្រហែលជាក្រោយចូលឆ្នាំខ្មែរនឹងរួចរាល់។ ចំណែក ធា នុរាជ ពេលត្រូវដៃគូទើបប្រកួតចាញ់បបួលឡើងសង្វៀនម្ដងទៀតមិនបានឆ្លើយតបនឹងសម្ដីរបស់ ម៉ើ ទេ៕
No comments:
Post a Comment