ព័ត៌មានថ្មីៗនេះឱ្យដឹងថា ជប៉ុនបានត្រៀមសាកល្បង យន្តហោះចម្បាំងបំបាំងកាយថ្មីរបស់ខ្លួន ឈ្មោះ F-3 នៅរដូវក្ដៅខាងមុខ។ នេះបើយោងតាមការរាយការណ៍ របស់ប្រព័ន្ធផ្សព្វផ្សាយយោធាចិន PLA Daily ។
របាយការណ៍របស់ PLA Daily បន្ថែមទៀតថា ប្រសិនបើការសាកល្បងទទួលបានជោគជ័យនោះ វាក្លាយជាការរកឃើញដ៏សំខាន់មួយរបស់ជប៉ុន ចំពោះយន្តហោះបច្ចេកវិទ្យាទំនើប កម្លាំងម៉ាស៊ីនថ្មី និងមានសមត្ថភាពអាចបំបាំងខ្លួនបាន។ យន្តហោះចម្បាំងជំនាន់ទីប្រាំនេះ មានសមត្ថភាពសំខាន់ៗបួនយ៉ាង គឺអាចបំបាំងខ្លួន មានល្បឿនលឿន អាចប្រើធ្វើការសមយុទ្ធ និងមានបំពាក់ប្រព័ន្ធអេឡិចត្រូនិកបញ្ជាទំនើបៗ។
ផ្នែកខាងក្រៅនៃយន្តហោះ F-3 បានភ្ជាប់ដោយបច្ចេកវិទ្យា អាចកាត់បន្ថយការចាប់ពីប្រព័ន្ធរ៉ាដា កាត់បន្ថយពន្លឺ គ្រឿងអេឡិចត្រូនិក កម្ដៅ សំឡេងរំខាន ដើម្បីជៀសវាងពីការតាមចាប់។ F-3 បំពាក់ដោយម៉ាស៊ីនកម្លាំងខ្លាំងទម្ងន់១៥តោន ផលិតដោយក្រុមហ៊ុន IHI Corporation របស់ជប៉ុន និងវិទ្យាស្ថានស្រាវជ្រាវបច្ចេកវិទ្យា និងអភិវឌ្ឍន៍របស់ក្រសួងការពារជាតិជប៉ុន ហើយម៉ាស៊ីននេះទៀតសោត មានភ្ជាប់បច្ចេកវិទ្យា XF5-1 low-bypass turbofan ផ្សំឡើងពីវត្ថុធាតុដើមសេរ៉ាមិច ធន់នឹងកម្ដៅខ្ពស់។
ដោយឡែកក្នុងដំណើរការការប្រយុទ្ធវិញ F-3 ត្រូវបានរចនាឡើង ឱ្យមានមុខងារច្រើន ទម្ងន់ស្រាល អាចហោះបត់បែនបានគ្រប់កាលៈទេសៈ។
ចំពោះប្រព័ន្ធអេឡិចត្រូនិកបញ្ជារបស់ F-3 វិញ មានបញ្ចូលទាំងប្រព័ន្ធរ៉ាដាមានល្បឿនលឿន ប្រព័ន្ធប្រយុទ្ធបែបអេឡិចត្រូនិក (ប្រព័ន្ធយុទ្ធសាស្ត្រសង្គ្រាម និង ប្រព័ន្ធគាំទ្របេសកកម្មធ្វើសង្គ្រាម ដូចជាគ្រឿងអាវុធ Sensor កាមេរ៉ាជាដើម ) និង ប្រព័ន្ធ Sensor វិទ្យុសកម្ម ដែលមានមុខងារច្រើនជាមួយនឹងខ្សែ Fiber ដើម្បីឱ្យមានភាពងាយស្រួលក្នុងការបញ្ជាចល័ត។ បន្ថែមលើនេះ វាមានដាក់បញ្ចូលបច្ចេកវិទ្យារ៉ាដា ដើម្បីពង្រីកវិសាលភាពតំបន់ និងចម្ងាយនៃការតាមដាន។ ក្រៅពីចំណុចសំខាន់ៗទាំងនេះ F-3 ក៏នៅមានមុខងារ និងបច្ចេកវិទ្យាទំនើបៗជាច្រើនទៀត៕
No comments:
Post a Comment